Sátt um uppbyggingu Landspítala við Hringbraut

Landssamtökin Spítalinn okkar fagna tveggja ára afmæli um þessar mundir. Samtökin hafa það markmið að afla stuðnings meðal almennings og stjórnvalda við úrbætur á húsakosti Landspítalans við Hringbraut.

Þorkell Sigurlaugsson, stjórnarmaður í samtökunum, birtir grein í Morgunblaðinu 9.apríl þar sem hann fjallar m.a. um uppbyggingu nýs Landspítala við Hringbraut.

„Hringbraut hefur margítrekað verið staðfest sem besti staðurinn af fjölda ráðgjafa, forstjórum Landspítala, borgarstjórn Reykjavíkur, sveitarfélögum á höfuðborgarsvæðinu og Alþingi Íslendinga“, segir Þorkell.

„Alþingi hefur samþykkt núverandi staðsetningu við Hringbraut oftar en einu sinni. Svæðisskipulag fyrir höfuðborgarsvæðið 2015-2040 liggur fyrir samþykkt af öllum sveitarfélögum á höfuðborgarsvæðinu.

Aðalskipulag fyrir Reykjavík og deiliskipulag fyrir Landspítalareitinn hefur verið samþykkt. Búið er að semja við hönnuði að undangengnu útboði og hönnun spítalans er í fullum gangi með þátttöku starfsfólks, sjúklinga, innlendra og erlendra ráðgjafa og hönnuða.

Verkframkvæmd er hafin og fyrsta byggingin, sjúkrahótel, verður risin á vormánuðum 2017“, segir Þorkell meðal annars í grein sinni.